الربح من الأبلووود
بسم الله الرحمن الرحيم
موضوعنا النهاردة عاوز تركيز شوية
الأول كدة يعنى ايه ابلودر UPLOADER
الأبلودر هو شخص بيشتغل فى منتدى بيجيب حاجات حصرية ذي افلام مثلا لسة نازلة أغانى برامج حاجات كدة لسة جديدة ويقوم جى رافعها على المنتدى وتدخل حضرتك تعملها داونلوود وهو بيكسب من كدة
حلو كدة
طيب نشرح التعريف ده حتة حتة عشان نفهم
اول حاجة إن الأبلودر بيشتغل فى منتدى
((المنتديات المعروفة لدى معظم العرب))((المشاغب-ماي إيجي - إيجي أب - عرب ليونز - مزيكا توداي - برامج نت)) وكتير غيرهم
حاجات حصرية : افلام أو أغانى أو برامج أو أو
هنا بقى نسأل هو بيجيب الحاجات ديه من اين ؟؟؟ صح ده السؤال اللى كله عاوز يسأله ومش عارف إجابته
بص ياسيدي عمرك سمعت عن موقع تورنت بس خاص
واحدة واحدة يابرنجى يعنى ايه اصلا تورنت ؟
اه .. هو انت اصلا متعرفش يعنى ايه تورنت
طيب واحدة واحدة كدة وركز معايا
التورنت ده ذي الداونلود اللى انت بتعمله بس الفرق إن الداونلوود اللى انت بتعمله بينزل على طول وملكش علاقة بحد
مش فاهم برده
التورنت فكرته قايمة على المشاركة يعنى مثلا لو انا و انت ومحمد وحسنين و إبراهيم بنزل نفس الفيلم من نفس الحتة الفيلم بيتقسم علينا وكل واحد بياخد الجزء اللى عند التانى لغاية مايكمل الفيلم عندنا كلنا
التورنت ده بيبقى ليه برنامج
ماعلينا المهم بيجيب الحصريات ديه غالبا من حاجة إسمها تراكر اللى هو موقع تورنت بس مش متاح التسجيل فيه معظم أوقات السنة حبقى افهمك فكرة عمله فى الموضوع اللى جاي حيبقى خاص بيه وبشرحه وححطلك رابطه هنا
نكمل التعريف بقى يقوم جاي رفعها (هو ده لب الموضوع ) رافعها
الرفع بيتم إذاي
ركز عشان حندخل فى كذا حوار
اولا حد يعرف أعلى سرعة للأنترنت فى مصر هنا كام
48 ميجا ديه أعلى سرعة وطبعا فى أماكن معينة ومش بتطلع لآي حد ديه بحاجة كدة ذي ترخيص
بتسأل السؤال ده ليه ؟
عشان عاوز أقولك إن معظم الشعب المصري ياإما عنده 512KB او 1MEGA
طيب الأبلودر دول لو حيرفعوا ع السرعة ديه فيلم مثلا 500ميجا مش حيخده وقت أقل من 10 ساعات
امال إذاي الناس ديه بتجيب الحصريات فى ساعتها يافالح ؟؟
الناس ديه صايعة ايوة ناس صايعة و انا عارف السر بقى
السيرفر هو جهاز بس إمكانياته عالية شويتين يعنى مثلا ممكن يوصل ل 32 جيجا رامات وهارد 10 طيرا وسرعة نت توصل ل 10 جيجا
شوف هو انا ممكن اعديلك كل اللى انت قلته ده بس انت أكيد كنت تقصد 10 ميجا لا ياكبير انا أقصد فعلا 10 جيجا خلينا بس فى المهم السيرفر ده بيبقى فى شركات بتأجره يعنى انت مثلا ممكن تجيب سيرفر من أول 40جنيه مثلا وفى 60 و 100و 500 وذي مانت عاوز على حسب المواصفات الخاصة بيك انت وبالنسبة لأكثر البلاد اللى ثابتة كفاءة فى الحوار ده هما امريكا وفرنسا و ألمانيا ديه الأماكن اللى بيبقى موجود فيها السيرفرات
اه خلى بالك بتبقى أسمها RDP
إختصار REMOTE DESKTOP لآن ديه الوسيلة اللى انت بتعمل اتصال بيها من الجهاز بتاعك للسيرفر ده
ماشي طيب فطبعا مش محتاج أقلك سرعة التنزيل و الرفع على السيرفر بتبقى عاملة إذاي انا عاوزك انت تتخيل و تنسى ال 50 كيلو اللى انت بتعمل بيهم داونلوود دول
طيب الجزء التانى فى الرفع بقى هو إنت لغاية دلوقتى عمال تدفعنى فى فلوس طيب انا امتى حاخد فلوس
جيلك أهوه دلوقتى
عارفين المواقع اللى انتم بتعملوا داونلوود من عليها ذي
كل المواقع اللى فوق ديه انت بتعمل داونلوود من عليها وغيرها كمان كل ال بيعملوا الباشا بعد مابينزل الفيلم من على التراكر بيضغط الفيلم وبيحط عليه حقوقه وبيترجمه ويرفعه على المواقع ديه
الكلام اللى بالدهبي ده حيتشرح لوحده فى موضوع تانى حيتحط رابطه فى الكلام
خلينا بس الاول فى المهم
المواقع ديه ليها حاجة إسمها نظام المكافأت او affiliate - referrals
ده بيبقى بكذا طريقة من ضمنهم إنك تحطلهم إعلاناتهم عندك فى الموقع مثلا او إن أي حد يسجل عندهم عن طريقك ويرفع ملفات وناس كتير تنزل ملفاته وهو يكسب و انت كمان ليك نسبة من ارباحه من غير ماينقص منه ولا مليم او لو حد اشترى من عن طريقك اكونت برميم او حساب ليه مميزات عن الحسابات العادية حضرتك بيبقى ليك نسبة فى البيع
الطريقة المعروفة بقى انك بتاخد ع كل 1000 تحميلة من ملفاتك من أول 1دولار لغاية ممكن توصل ل 25دولار وده بيختلف ع حسب الدولة اللى بتعمل داونلوود
ايوة كل دولة وليها تمن حضرتك ده نظام المواقع او السيرفرات ديه
سؤال ع ماشى كدة اشوفك صاحى معايا ولا لآ؟؟
طيب هى المواقع ديه بتدفع فلوس للأبلودر عشان خاطر الأكونتان البرميوم اللى بيبعوها عن طريقهم بس ؟؟
لالالالا كان زمانهم فلسوا من زمان
الإعلانات ياريس حضرتك وانت داخل بتحمل فى كمية إعلانات بتتفتح هى ديه الى بتعمل الشغل وبيديهم نسبة منهم
اظن كدة وصلت السؤال ده كان محيرنى انا نفسي لغاية فترة قريبة
اصل مش حضرتك ولا 1000000 بس اللى بيعملوا داونلوود من عندهم يعنى مثلا رابيد شير ده فى كام مليون واحد بيعمل داونلوود من عنده كل يوم وقول ياعم 10% بس هما اللى بيفتحوا الإعلانات وصلت أكتر
بس بالمناسبة رابيد شير و ميديا فير و فيل كلود مش ربحيين
بس ياكبير انا كدة وضحتلك الدنيا شوية وبرده كالعادة سبت مساحة للأسئلة
تحت امركم وحشرح باقى الموضوع فى توبيك تانى عشان فيه متعلقات بالموضوع عارف إنها فى ناس بتدور عليها
التوبيكات اللى جاية الخاصة بالموضوع بتاعنا حتبقى
شرح وافى للويندوز سيرفر
شرح وافى لضغظ و إضافة الحقوق على الأفلام وترجمتها
شرح وافى لكيفية تحويل الفلوس من حسابك الخاص فى مواقع الرفع لغاية باب البيت ؟
وبكدة إن شاء الله نكون خلصنا الأبلوود تماما
ليست هناك تعليقات:
إرسال تعليق